#50 Твојот AI чек-ин за крај на 2025

🧠 Последното Aitekka издание за 2025: мала ревизија на мозокот

• Кое AI ниво го постигна ти во 2025

• КВИЗ: Колку си AI писмен

• ПРОМПТ: самоевалуација + план за 2026

• 5 идеи за подобар резултат

• Кого следиме, од кого учиме - наши препораки

• До нашите читатели 🫡♡✧˚

2025 беше година во која AI престана да биде „нешто ново“ и стана дел од секојдневието. Не е алатка што ја пробуваш еднаш, туку место каде што поминуваш дел од денот: таму пишуваш, планираш, пребаруваш, се консултираш, си го расчистуваш хаосот, понекогаш и го губиш трпението.

И баш затоа, на крајот на годината има смисла да не правиме листа „најдобри алатки“, туку да се прашаме нешто подлабоко:

Дали AI ми го подобри размислувањето— или само ми го забрза темпото?
Дали ми ја олесни работата — или ме направи зависен?
Дали ми го зголеми квалитетот — или само продукцијата?

Ова издание е направено да добиеш подобра перспектива за твоето искуство со AI и како понатаму.

3 нивоа на „AI зрелост“

Дали се наоѓаш во некое од овие?

1) AI како брза опција.
Кога го користиш за да заштедиш време: текстови, шаблони, резимеа, преводи, брзи идеи. Ова е супер… сè додека не почне да ти го заменува размислувањето.

2) AI како ко-пилот.
Кога му даваш контекст, цел и критериуми, па заедно градиш нешто: подобра структура, подобри аргументи, подобра комуникација. Тука обично се случува „аха“ ефектот.

3) AI како огледало.
Најретката, ама најмоќната зона: кога го користиш за да си ја фатиш сопствената пристрасност, да си ги видиш слабите точки, да си ја затегнеш стратегијата, и да донесеш одлуки што ќе ги потпишеш со име и презиме.

✅ КВИЗ: Колку си „AI-писмен“?

Ако во 2025 користеше AI речиси секоја недела, многу е лесно да си кажеш: „Океј, јас ова го знам.“

Ама знаење не е исто што и сигурност во пракса.

Еве го квизот: AI писменост  
Ќе добиеш јасна слика дали твоите „основи“ се навистина стабилни.

🎁 ПРОМПТ: самоевалуација + план за 2026

Овој промпт е замислен како лична ревизија. Можеш да го внесеш во ChatGPT / Claude / Gemini. Најдобро работи ако одговориш искрено, со конкретни примери од твојата работа/живот.

Промпт (на англиски за да работи најдобро во повеќето модели, а подолу на македонски):

Подолу имаш 5 готови реченици што можеш да ги копираш и да ги додадеш на крај на било кој промпт. Секоја од нив го подобрува одговорот на различен начин (поставува прашања, проверува извори, се самопоправа…)

• Разјасни прво (убива погрешни претпоставки)
  „Пред да одговориш, поставувај ми појаснувачки прашања сè додека не си 95% сигурен/на дека точно разбираш што сакам. Дури потоа генерирај финален одговор.“

• Провери ажурност и извори
  „Пред да одговориш, провери ги најновите и најверодостојни информации (со извори и датум/време на проверка). Ако немаш можност за пребарување, кажи што точно би пребарал/а, кои извори би ги сметал/а за најдоверливи и што може да биде застарено.“

• Самооценување
  „Пред да го испратиш одговорот, самоевалуирај го според: точност, целосност, корисност и јасност. Подобрувај го додека не биде најмалку 9/10 во секоја категорија.“

• Панел од 3 експерти
  „Одговори како панел од 3 експерти: практичар, скептик и уредник. Покажи каде не се согласуваат, па синтетизирај една финална препорака со најдобрите компромиси.“

• Адвокат на ѓаволот (најди ја слабоста)
  „Откако ќе го дадеш одговорот, критикувај го од перспектива на скептик: посочи пристрасности, пропуштени агли и логички дупки. Потоа предложи како да се поправат.“

Заследи го Goran Trajkovski, Ph. D.

Горан Трајковски („A More Beautiful Prompt“) вреди да го следиш затоа што ретко кој пишува за AI на ваков начин: со оригинални и длабоки размислувања што те учат како да размислуваш подобро и да го користиш AI одговорно и прецизно.

Посебен shout-out до Институтот за родови студии (Филозофски факултет – Скопје) за нивната неуморна работа околу AI: не зборуваат за „AI во теорија“, туку градат практични алатки и ресурси што ја прават темата разбирлива, применлива и општествено одговорна.

Што следиме од странските изведувачи:

1) Matt Wolfe
Кратки, практични прегледи на најкорисни AI алатки + демо како реално се користат. Одличен за „што да пробам оваа недела?“.

2) The AI Advantage
Јасни туторијали за почетници: чекор-по-чекор како да користиш алатки за работа, содржини, организација и продуктивност.

3) Rowan Cheung
Следи што е ново во AI, но со фокус на „што значи ова за тебе“ и како може да се искористи.

4) Rob The AI Guy — фокус на практични AI решенија за продуктивност и автоматизации и идеи како AI може да помогне и во заработка/онлајн бизнис.

А за нешто повеќе од секојдневни алатки, еден “brain strech“ со Ilya Sutskever. Не пропуштајте секоја прилика за негово интевју: неговите размислувања често ја погодуваат суштината на тоа каде оди AI.

Им благодариме на сите што нè читаа, поддржаа и учествуваа во овие 50 изданија на Aitekka. Основната замисла е остварена — создадовме место каде за AI се зборува разбирливо и практично. Во 2026 си посакуваме повеќе разговор и повеќе учење едни од други. Затоа споделете и следете — колку е поголема заедницата, толку подобри идеи се раѓаат.

А тебе драг читателу ти посакувам мирна глава, повеќе љупопитност, храбри идеи и алатки што работат за тебе. Среќна Нова! 🥂✧˚ ༘⋆2026✧˚ ༘ ⋆